Angaizish e Adal By Abdul Ahad

عبدلاحد ابھرتے ہوئے نئے لکھاریوں میں یقیناً ایک بہترین اضافہ ہیں۔ ان کی تحاریر کی سب سے خاص بات مجھے ان کی مقصدیت لگتی ہے۔ باقی تحاریر کو ذرا بعد کے لیے چھوڑ کر ابھی ہم انگیزشِ عدل کی بات کرتے ہیں۔ پچھلے چند ماہ سے آپ سب نے اس کا نام سنا ہوگا۔ اور آپ جانتے ہوں گے کہ یہ ایک ہیسٹاریکل فکشن ہے۔ اپنی بات کروں تو مجھے اس یونرا سے کچھ خاص لگاؤ نہیں ہے۔ مگر عبدلاحد نے جس خوبصورتی سے اس افسانے کو تحریر کیا ہے وہ قابلِ داد ہے۔ الفاظ، منظر نگاری، کردار کی بنت ہر ایک چیز کو اسی دور کے مطابق لکھا گیا۔ مجھے اس افسانے کا پلاٹ بے حد پسند آیا۔ ماضی میں پیش آئے ایک دردناک واقع کے نتائج کو جس طرح اس افسانے میں بیان کیا گیا وہ بہترین تھا۔ کس طرح امرتسر کے جلیانوالہ باغ میں پیش آئے اس ایک حادثے نے امرتسر کے رہائشیوں کی سوچ اور ان کی ہمت کو بدل کر رکھ دیا۔ کرداروں کی بات کروں تو کہانی کے دو ہی اہم کردار تھے جن کی آنکھوں کے بارے میں مصنف نے بہت کچھ لکھا۔ اب یہ تو آپ پڑھ کر ہی جانیں گے کہ ایسا کیا لکھا۔ مجھے البرٹ کا کردار پڑھتے ہوئے بہت مسرت ہوئی تھی۔ جس طرح مصنف نے البرٹ کا کردار لکھا ہے وہ یقیناً ہر قاری کا پسندیدہ بن سکتا ہے۔ البرٹ کے کردار کی خوبصورتی اور یاسمین کے کردار کی مظبوطی سے لے کر چمنِ گلاب کی مٹھاس تک سب تعریف کے مستحق ہیں۔ کہانی کا اختتام بلاشبہ حیران کن ہونے کے ساتھ ساتھ جسٹیفائیڈ تھا۔ اس افسانے کو پڑھ کر میں نے جانا کہ ایک لکھاری کو لکھنے کے علاؤہ بھی بہت کچھ معلوم ہونا چاہیے تبھی وہ ایک بہترین تخلیق کر سکتا ہے ورنہ لکھتے تو بہت سے لوگ ہیں۔ اگر آپ بھی ایک لکھاری ہیں یا چلیں محض قاری ہی ہیں تو میری اس آخری بات کو مدِ نظر رکھتے ہوئے انگیزشِ عدل پڑھیے گا یقیناً آپ کو بہت فرق محسوس ہوگا۔ میری دعا ہے کہ اللہ پاک لکھاری کے قلم میں یوں ہی وسعتیں عطا فرمائے آمین۔