Baandi by Nida Hosayn

“باندی” ان کہانیوں میں سے ہے جو اپنے پلاٹ سے زیادہ اپنے زخم کی وجہ سے یاد رہ جاتی ہیں۔ ندا حسین نے ایک پورا سماجی اور نفسیاتی نظام صرف چند مناظر میں کھول کر رکھ دیا ہے۔ کہانی کا کمال یہ نہیں کہ اس میں تشدد دکھایا گیا ہے، بلکہ یہ ہے کہ تشدد کو ایک ایسے معمول کے طور پر پیش کیا گیا ہے جسے سب کردار فطری سمجھتے ہیں۔ یہی چیز متن کو بے آرام اور مؤثر بناتی ہے۔

مرکزی کردار کی سب سے دلچسپ بات یہ ہے کہ اس کی مزاحمت جسمانی نہیں بلکہ فکری ہے۔ وہ کمزور ہے، زخمی ہے، مار کھاتی ہے، مگر اس کا اصل انکار زبان میں ظاہر ہوتا ہے۔ وہ اس رشتے کو تسلیم کرنے سے انکار کرتی ہے جو اس پر مسلط کیا گیا ہے، اور اسی انکار سے پوری کہانی کی معنویت جنم لیتی ہے۔ اس کے مقابلے میں مرد کردار محض ایک ظالم فرد نہیں بلکہ طاقت کے اس تصور کی نمائندگی کرتا ہے جو خود کو اخلاق، مذہب اور اختیار کے پردوں میں چھپا لیتا ہے۔ اسی لیے “تم خود خدا ہو” جیسا جملہ صرف ایک شخص پر الزام نہیں بلکہ پورے نظام پر فردِ جرم محسوس ہوتا ہے۔

فنی اعتبار سے کہانی کی سب سے بڑی خوبی اس کی معاشی نثر ہے۔ مصنفہ غیر ضروری وضاحتوں، پس منظر یا جذباتی خطابت سے گریز کرتی ہیں۔ ہمیں یہ نہیں بتایا جاتا کہ یہ دنیا کیا ہے، اس نظام کی تفصیلات کیا ہیں یا کردار یہاں تک کیسے پہنچے۔ اس کے باوجود چند اشاروں سے ایک مکمل کائنات بن جاتی ہے۔ کہانی پڑھنے سے قبل دھیان رہے یہ سادہ ایک نشست میں پڑھے جانے والی داستان نہیں۔ یہ آپ کو یاد رہے گی اور درد دے گی۔