Be Awaz Aurat by Farwa Gull

افسانہ بے آواز عورت جاگیر دارانہ نظام اور اس کے زیر سایہ پنپتے استحصال کو موضوع بحث بناتا ہے۔ مائی میداں اور مائی جنت ساس، بہو ہیں۔ یہ دونوں عورتیں اپنے اجڑے گھر میں زندگی کے دن کاٹ رہی ہیں ۔ سلیم مائی میداں کا بیٹا اور مائی جنت کا شوہر تھا۔ چوہدری کے ناپاک جرائم کا عینی شاہد، جسے اس کے بیٹے انعام کے ساتھ چوہدری نے بے دردی سے قتل کروا دیا۔ سلیم نے چوہدری کے کارندوں کو بچوں کی اسمگلنگ میں ملوث دیکھا اور اس نے تھانے میں ایف آئی آر کٹوا دی۔ نظام کی شکستہ و کریہہ صورت یہاں ابھر کر سامنے آتی ہے جب انسپکٹر تحریری شکایت لکھے بغیر سلیم کو گھر بھیج دیتا ہے اور اگلی صبح سلیم کو چوہدری کا بلاوا موصول ہوتا ہے۔ سلیم کا بیٹا انعام باپ کو بچانے کی خاطر پیچھے جاتا ہے اور پھر دونوں باپ بیٹے کی لاش چوراہے پر ملتی ہے۔ مائی جنت اس دن سے خاموش ہے اور مائی میداں اپنے اجڑے گھر کی حالت اور اپنی بہو کی خاموشی پر رنجیدہ و دل گرفتگی کا شکار ہے۔
کہانی کی بنت اچھی ہے۔ پاکستان میں موجود جاگیردارنہ نظام کی سفاکی اور عام آدمی کی بے وقعتی کی اچھی تصویر کشی کی گئی ہے ۔ کردار نگاری البتہ مزید بہتر کی جاسکتی ہے فی الحال ہر کردار کی ایک مختصر سی جھلکی دکھا کر بیانیہ پر زور دیا گیا ہے۔ اس طرح مضبوط کردار بھی بہت سادہ اور غیر موثر محسوس ہورہے ہیں اور ایسا ہر کردار کے لیے ہے۔
اسلوب سادہ اور سلیس ہے۔ کہانی کی روانی پر اثر نہیں ڈالتا۔ مجموعی طور پر مصنف کی جانب سے اچھی کوشش ہے ۔ مگر بہتری کی گنجائش موجود ہے ۔
شائزہ یامین