Phool Or Mitti by Attiah Eman

پھول اور مٹی۔ میں پورے وثوق سے کہہ سکتی ہوں کہ ایسی کہانیاں آج کے دور میں بالکل ناپید ہیں۔ یہ وہ کہانی ہے جس نے مجھے قدیم مصنفوں اور ان کے قلم سے پروئی گئی عظیم کہانیوں کی یاد دلائی۔ یہ کہانی گناہوں کی ہے، یہ کہانی انسانوں کی ہے، جو غلطی کرتے ہیں، جو گناہ کرتے ہیں؛ جو گناہوں کو مان کے انہیں شکست دیتے ہیں اور جو گناہوں کے آگے گھٹنے ٹیک کے مٹی ہوتے ہوئے بھی اکڑنے لگتے ہیں۔ کہانی میں سب سے منفرد تمثیل نگاری تھی، ایسی تمثیل نگاری میں نے بہت کم دیکھی ہے اور اس سے بھی کم اس تمثیل نگاری کی خوبصورتی سے کہانی کو چار چاند لگاتا ہوا دیکھا ہے آج کے لکھاریوں کو۔ کہانی نے پہلے لفظ سے آخری سطر تک مجھے جکڑ رکھا تھا، کئی بار میری آنکھیں نم ہوئیں، کئی بار ضمیر جھنجھوڑا گیا۔
اسے میں کہانی نہیں داستان کہوں گی، داستان خدا سے انسانوں کے ایک خوبصورت سے تعلق کی، داستان گناہوں پہ غم زدہ ہو کر توبہ کے پانی سے فائدہ اٹھانے کی۔ داستان پشیمانی کی، داستان حسد کی۔ حسد کی آگ جو جلا کے راکھ کر دیتی ہے، جہنم کی لامتناہی آگ سے ملا دیتی ہے، وہ آگ جس سے ابلیس بنا، وہ آگ جو انسان کے ضمیر کو نگل جاتی ہے۔
اگر آپ یہ تبصرہ پڑھ رہے ہیں تو مکھ پہ یقین کریں اور اس کہانی کو پڑھنا خود پہ لازم سمجھیے۔ کیوں کہ ایسی کہانیاں ان انمول ستاروں کی طرح ہیں جنہیں دیکھنے اور سراہنے والے بھلے کم ہیں، مگر اصل میں فائدے میں ہیں۔
اللہ لکھاری کے قلم میں برکت دے اور انہیں ایسی کئی کہانیاں لکھنے کی توفیق دے۔ آمین۔